一生貴人多！嘟姐刻薄子華長氣農夫好受落

組合農夫成員陸永及C君尋晚喺旺角麥花臣場館舉行一連六場演唱會，兩位除咗唱歌之外，仲好感激喺十八年陪住佢哋嘅幾個人，當中梗係唔少得堪輿學家麥玲玲，喺安哥環節，玲玲更出嚟同佢哋合唱《風生水起》，唱完之後仲封咗兩封生日利是畀佢兩個，首先同陸永講：「夠畀首期㗎啦！」然後再同C君講：「夠買太空船啦！」

隨即二人大玩即場拆利是，發現係一人五百蚊，陸永即話：「玲玲師傅睇淡個樓市嘅！」之後C君就講笑話一千幾百唔恨，記得迎賓時有位男觀眾話自己生日，所以叫佢上台對身份證，轉贈封利是話：「生日都要睇騷，係賠償嚟嘅！」

另外，佢兩個又好多謝經理人DJ Tommy，話佢當時應該係走投無路，先會簽佢哋：「我哋覺得Tommy應該覺得DJ係夕陽行業，所以先會想做經理人，想做到係人經過都想簽。」而眾所周知鄭裕玲（嘟姐）都好鍾意叫農夫做「垃圾」，佢兩個爆話呢個只係鏡頭前咁話佢哋，C君話：「有次一齊出Trip，佢又唔開得夜，即係要開得早，又唔鍾意人哋遲到，我有次冇化妝冇梳頭，衝落去大堂，佢一睇到就指住我話『剪吓個頭啦，乞兒』！」然後陸永話有次嘟姐向佢推介韓國人氣組合防彈少年團（BTS），但佢當時拒絕睇佢哋嘅演出，某日睇番覺得好正，而身為BTS粉絲嘅嘟姐即刻話：「依家先鍾意，咁賤格！」仲大爆對方鍾意韓星嘅準則唔係大隻同靚仔，而係乖！陸永話：「你點睇到佢好乖？佢跳舞好乖？」

至於黃子華，佢兩個話佢嘅人生哲理好似胎教咁，一路都有睇佢嘅騷，喺上次子華Talk騷時佢兩個有份參加慶功宴，點知想走畀佢叫停話傾偈，點知一傾就六個鐘：「由凌晨一點開始，足足係騷嘅三倍時間，我同佢講雖然我鍾意聽你講嘢，畀錢嚟聽，但我真係頂唔順，你金盆?口咪幾好！」

----------------------------

東網巨星開咗ig喇，大家快啲follow啦！

https://bit.ly/2JjSVcr