王浩信江嘉敏無懼緋聞埋身肉搏

藝人王浩信、伍允龍、楊明、朱晨麗（朱朱）、江嘉敏、劉穎鏇（Tiffany）、陳庭欣、石修等，一同現身荃灣為台慶劇《兄弟》造勢，其中Tiffany配合戲中角色身穿打拳裝束出場，大騷弗爆身材，即惹來Fans尖叫聲！席間眾人分組玩射槍及打拳遊戲，王浩信及江嘉敏並沒有受緋聞影響，埋身打拳全沒芥蒂；朱朱更追住伍允龍大打出手，最後二人雙雙倒地，場面爆笑！

主角三兄弟受訪時均表示對新戲即將播出既期待又緊張，王浩信指：「始終係台慶劇，大家嘅關注度會提升，好睇就會加分，如果有瑕疵就或者被放大，不過自己都睇咗成套劇好多次，覺得好順暢，依家就做多啲宣傳，每段入面有好多細節，希望觀眾飯後可以集中，抱住打機心情睇。」續指會配合戲中飾演KOL角色，會於社交平台上分享劇情：「就好似人哋啲爆機序章、爆機攻略，畀大家重點欣賞。（之前《跳躍生命線》成績咁好有壓力？）冇，自己都係想盡力做好戲畀觀眾，希望承接到好收視。」

至於楊明就感嘆指辛苦半年終於有收穫，問到會否同女友莊思明一齊睇？他表示因為正拍攝《機場特警》，未必有時間，或有機會出街食飯時先睇。

講到好友陳展鵬昨晚於IG上宣布做爸爸，伍允龍開心指都有即時恭喜對方，問到是否一早知情？他否認並謂因工作都冇去婚宴：「之後面對面見到佢會再恭喜佢。（會送禮物？）見面再問吓佢有咩需要。」