老公負責搞生日P 楊卓娜爆9歲囡囡「變態」

2018年11月10日 18:00
東網電視
更多新聞短片
楊卓娜大爆囡囡好學程度達「變態」級數!

「壽星女」楊卓娜於正日生日出席慈善義賣活動,她表示此舉別具意義:「會呼籲啲人嚟買嘢,自己亦會買。(會唔會同阿女一齊做慈善?)都會呀!但要就番佢啲返學時間。」其後續爆9歲囡囡好學程度達「變態」級數:「佢寧願返興趣班都唔會去生日會嗰啲Party。」

問到今晚會如何慶祝?卓娜冧笑指老公有幫她搞生日Party,更親自用氣球布置場地,會邀請家人、妹妹楊怡、妹夫羅仲謙、甚至妹夫一家出席,非常熱鬧!講到生日禮物,她表示本來妹妹夾埋老公送手袋,不過都被她婉拒,因為唔想嘥錢。問到生日願望?卓娜希望全家都身體健康,並希望能於戲劇上嘗試更多角色、拍更多廣告。

想妹妹快啲生B

講到有報道指楊怡想生B,但因脊椎問題搞到遲遲未有好消息,卓娜指妹妹好少主動同自己講身體情況:「都知佢成日都呢度痛、嗰度痛嘅,係因為佢之前拍古裝戲成日戴頭套,搞到肩同頸都有受傷,今晚會關心吓佢。(佢有同你講過想要BB?)咁我都想佢快啲有BB,相信佢都係。(佢有問你生B貼士?)冇呀,佢同媽咪住,相信媽咪都會照顧好佢,BB都係一個緣分,隨緣啦!最緊要身體健康,開開心心。」