陳展鵬認奉子成婚：被迫隱瞞大家！

藝人陳展鵬宣布太太單文柔有喜後，晚上現身沙田出席活動。心情大靚的他禁不住打從心底發笑，又形容心情「興奮、突然及喜悅」，直認奉子成婚：「好多朋友問我係咪有咗先結婚，定係一個月就搞掂，你估真係機器咩？放啲嘢入去就跌啲嘢出嚟，小朋友係上天賜嘅禮物！講真，今次可以話一額汗，早於去年年中我做訪問，已經話要結婚，咁年頭咪開籌備囉，點知去英國影婚紗相時就發現（有喜）喇，婚禮場地都準備晒，老人家話唔講得，所以我哋被迫隱瞞大家。」

展鵬表示多謝公司上下體諒：「我冇所謂啫，老婆係新人，不斷推工作，好彩啲監製好似知道咁冇怪佢，依家終於可以講得喇。（想生仔定女？）我冇所謂，不過老婆就想係仔，佢好似覺得同我組織家庭之後，要有個仔傳宗接代。（話唔定打孖嚟。）咁要幾個月後先知，小朋友我ok㗎，依家好似叫胡咁，話唔定我三年抱兩！」

展鵬又指太太身孕約3個月，目前已「見肚」：「佢平時揀衫靚，我都佩服佢。（預產期呢？）出年4、5月，會喺香港生。（你媽咪好開心？）由我結婚已經好開心喇。（老婆以後湊B？）睇佢意願，我知佢想做嘢，入行兩年咋。」