負傷彈結他　布志綸強忍痛楚當磨練

歌手布志綸（Alan）到九龍灣出席晚宴，他表示之前夾傷的手指仍未完全康復：「但我堅持照彈結他，我同支結他好似走天涯咁。」他坦言手指仍有痛楚，但會當成鍛鍊：「啱啱喺音樂節見到新一派，佢哋比較瘋癲啲，我十幾年前就玩呢啲，依家比較成熟。」問他可要食止痛藥？他稱不用，但要等指甲甩出來：「好似要半年，之前我3日瞓唔到覺，『十指痛歸心』係堅嘅，終於明點解滿清十大酷刑係夾手指，如果10隻手指爆晒，真係會咬自己條脷！」

提到明天（11日）Alan的所屬樂隊Mr.將於亞博演出，Alan指Mr.有新歌面世：「相信大家都知我哋5個人嘅經歷，呢首歌係個總結，同社會都有關連，任何人都有嘢想釋放但被壓抑住，我哋就用音樂釋放。」講到年底頒獎禮，他指自己有歌派台，因此會出席：「Mr.今年冇派歌，未知佢哋去唔去。（Dash忙於湊仔？）盡量做啦，呢行成日夜瞓，做嘢唔定時，宣傳多過以前好多，但未必有效果，造音樂真係愈嚟愈艱苦，我愈嚟愈殘就係咁解，但我好享受呢啲挑戰，希望做個榜樣畀小朋友睇。」