海俊傑背妻約索女睇樓 入酒店「開餐」

2018年11月11日 00:00
東網電視
更多新聞短片
海俊傑今次斷正喇!

去年結婚的海俊傑被發現背住老婆,與樣靚身材正的索女約會!兩人先去睇樓,隨後轉戰酒店「開餐」,期間更幫對方撥頭髮及披褸,舉止親暱!

藝人海俊傑早幾年密密北上賺人仔,最近宣布回流香港,重返樂壇及電視圈,相隔近廿年再拍無綫劇集《法證先鋒IV》。工作得意的他,去年與老婆莫家慈拉埋天窗,感情穩定兼想生B,但竟被發現撇甩老婆,與一位年輕索女密會!

陪睇樓密密斟

穿上型格皮褸的海俊傑在黃埔街頭等人,一會兒後有一名年約廿多歲的索女靠近,身穿露肩衫配短裙晒長腿。他見到靚女即刻四萬咁口,會合後先到地產舖睇樓,企在門口慢慢睇樓盤,其後更入內詢問地產經紀意見,兩人全程有傾有講。現場所見,海俊傑專攻逾千萬元的單位,看來早年在內地賺到一大筆人仔,有意在港買樓置業!

頭貼頭玩自拍

睇完樓盤,兩人轉戰附近酒店開餐,過馬路時海俊傑出手輕扶對方,借機一展紳士風度。High Tea期間,兩人邊食邊傾密偈狀甚Happy,還幾乎頭貼頭睇電話,又齊齊玩溫馨自拍,快將46歲的他跟索女伴完全沒有代溝!之後,海俊傑再次盡顯細心一面,不但幫索女夾嘢食,見大風吹到對方頭髮亂了,出手幫她撥頭髮。坐到涼涼哋,他又除下皮褸為對方披上擋風,僅穿短袖衫下乘機大騷麒麟臂,氹到索女勁開心,看來兩人關係似乎非一般朋友咁簡單!