《官人我要》成就高低　邵音音曾自殺

老戲骨邵音音接受電台訪問談到1975年，憑吳思遠執導的《十三號凶宅》一脫成名，自此她就被標籤為肉彈艷星，不少人認為她為錢出賣身體，她說：「記得拍之前，從來冇人同我交代呢齣戲要裸露，我只係跟從導演嘅指示去做，當時年青根本唔知鏡頭可以zoom，個『公仔佬』（影劇照的人）用長鏡頭影咗好多相畀雜誌，結果呢部戲上映後，幾乎所有工作都要我剝衫，唔除就冇戲拍。我搵過其他工作，人工低冇問題，但做清潔都冇人請！恬妮就游說我唔好接觸外界為錢繼續拍，我係為咗生活拍，每次都好難過，所以我從來唔睇我嘅電影，出街會戴帽，好怕人認到我。」

着肚兜被封殺

1978年，她因為《官人我要》一片成為首位華人女星出席康城影展，怎料一夜之間就由事業高處跌入谷底：「當年康城影展，我着住肚兜亮相，外國傳媒以China Doll來形容我，台灣嗰邊話我係間諜，就即刻封殺，當年台灣巿場對香港好重要，之後冇傳媒敢採訪我，冇人搵拍戲，其實我估係台灣當局搵個藉口將香港電影封殺，我就成咗祭品！」

朋友家人離棄

她坦言回港後曾為此事自殺：「我食咗好多死貓，覺得人生冇意義，就連朋友同家人都覺得我係間諜，同我斷絕來往，我好氣餒，覺得活下不去！」到07年復出影圈接拍郭子健執導的《野良犬》首獲金像獎最佳女配角後，才令她重新得到肯定，亦令她對電影及人生的態度有所改變，子女也不再介懷她曾當過脫星，現在的她，才是人生最快樂的時候。