徐冬冬光棍節晒男友視角　網友心碎一地

早前主演票房超過25億人民幣嘅電影《西虹市首富》嘅內地女星徐冬冬，有「中國第一美胸」之稱，向來都係網民心中嘅女神，女神前日突然喺微博宣布拍拖，殘酷消息破碎一眾粉絲心！不過冬冬未有公開對方身份，隨即引來網民揣測男友身份，更有指係前台灣小虎隊成員陳志朋，因為冬冬曾發文話「喜歡陳志朋，做自己挺好的！」被問到男友係咪陳志朋，當時冬冬只係以「.........」回覆網友。而日前冬冬接受內地傳媒訪問時，只係透露男友係比自己大十年嘅香港歌手、演員。

正當網民估緊邊個係幸運兒時，冬冬趁住今日雙十一上載咗幾張男友視角嘅相放閃，相中冬冬以素顏家居look上陣，仲捧住成隻燒鵝食，並留言晒恩愛：「男友視角的我…他一定是怕我太美被人搶走…所以把我女漢子的一面拍的相當到位……#光棍節幫你脫單# ​​​​」唔少「單身狗」網民傷心留言話：「冰冷的狗糧拍在臉上，真讓人難過。」、「冬冬公布戀愛後，一天一碗狗糧啊」！