洪卓立4事！《彌敦道》爆肺「死」足1800次

一講洪卓立（Ken），大家一定諗起4樣嘢，就係湯怡、爆肺、《彌敦道》同打機，依家31歲嘅佢如果要出一本傳記，呢4樣嘢，基本上可涵蓋佢嘅上半生。

Ken於2006年參加「英皇新秀歌唱大賽」奪得亞軍，因為唇紅齒白，甚受女性歡迎，成為翌年嘅新人王。2008年更憑佢憑《彌敦道》一曲橫掃各大電台歌曲榜冠軍，風頭一時無兩。

不過Ken「弱質纖纖」嘅外形裏面原來真係潺仔一名，2009年因爆肺兼肺積水被逼停工休息接近兩年，更多次被網民誤傳死訊死足1,800次，有網民仲惡搞佢首《彌敦道》變成《陰陽路》，大吉利是咩！

雖然Ken入行初期被傳狠飛圈外女友，同衛詩雅戲假情真，不過佢哋戀情唔夠半年就無疾而終，與此同時佢師妹湯怡就對Ken呵護備至，好快就一拍即合，但佢哋為保護愛苗，到2013年先承認戀情。佢哋之後仲玩同居，彼此視對方為結婚對象添！

講起Ken，一定唔可以唔提佢鍾意打機，被封為圈中機王，佢近年仲升呢做老闆成立電競職業隊。湯怡冇怨言之餘仲落場一齊打，仲話試過男友打機時，為佢敷面膜，可惜此情不再。