谷祖琳鹽水都唔吊！田蕊妮自爆醉爆老蘭

現年41歲的田蕊妮（阿田）到觀塘為自己主持的真人騷《女人四十》舉行記者會，蔣怡、車婉婉及谷祖琳（小谷）到場支持，大會特別送上Bra形蛋糕，慶祝節目將於11月20日晚上10時30分首播。阿田受訪時坦言很緊張，又謂：「我踏入40歲最想做就係呢件事，節目內容、嘉賓同流程我都參與好多，壓力好大、好辛苦，差的唔想拍。」問阿田有否問過老公杜汶澤意見，她表示：「有時做到好大壓力，好攰，老公見我好似攤屍咁！」阿田又指每日要拍攝12小時，去到尾都捱不住病倒。又透露節目有笑有淚：「好多人覺得女人到咗四十歲係一個結局，但我唔係咁諗，覺得四十歲依然可以好靚，要學識欣賞自己，畀人知道我四十歲都冇問題，所有歲數都可以好靚。」

谷祖琳捱義氣

阿田又大爆去蘭桂坊拍攝時飲醉酒，全身發紅：「佢哋問我點解面上有一點點白色，我話啲遮瑕膏冇跟住我變紅！」而小谷更醉到幾日後才發現遺失了手袋，四出問朋友後發現手袋其實在家中，阿田笑說：「好彩佢冇整唔見個女！不過佢好有義氣，本來喺醫院吊緊鹽水都抆咗佢幫我拍。」小谷就解釋並非重病，只是進行療程：「我唔想改期，其實抆鹽水對我冇乜影響，不過去到現場就包住隻手，個頭又亂，妝又未化完，嚇親人！」

自嘲冇奶水

提到婉婉將兒子BBQ交給阿田拍攝，婉婉透露本來並不放心，又怕老公不喜歡太過高調，幸好最好順利把囝囝的第一次交給田姨姨。阿田坦言曾擔心BBQ會失控：「原來佢好好湊！（你還BBQ畀婉婉嗰陣，佢有冇向媽媽求救？）冇呀，仲伏喺我心口，我好冧。」婉婉笑說：「我好Hurt！衰仔！」問到為何不選擇蔣怡或小谷的小朋友？阿田指小谷的女兒已長大，沒甚麼挑戰性：「蔣怡細嗰個仲飲緊人奶，我冇奶水呀！」至於去了台灣拍攝關於雪卵的內容，她表示台灣比香港平得多，但詳情就要觀眾收看節目。