東方日報C1:黎耀祥被追斬 驚動台灣飛虎

2018年11月17日 03:10
東網電視
更多新聞短片
激鬥群毆!

兩大視帝黎耀祥、陳豪由香港打到台灣,前日更與十多名手持利刀的大漢在鬧市廝殺,殊不知肉搏情節嚇親途人報警, 最後更出動到台灣飛虎隊到場, 認真大陣仗!

由陳維冠監製、兩大視帝黎耀祥、陳豪、李佳芯、龔嘉欣、高海寧等主演的無綫重頭劇《殺手》現正於台灣拍攝,由於題材關係,不論男、女都動作連場。開拍前,祥仔、陳豪及龔嘉欣都要Keep Fit、操肌苦練一番,眾人大部分打戲亦親身上陣搏到盡,更因而搞到周身傷!嘉欣的手指早前韌帶撕裂,祥仔就傷了膝頭,要邊拍邊針灸治療,陳豪則手腳瘀晒,但為了趕戲,他們都頂硬上。
十字路口埋身肉搏
經過半個多月的台灣拍攝,現時外景已進入尾聲,所有打戲都結集在這些日子,昨晚飾演「殺手」的祥仔要拍一人打十多人的戲份,通告由晚上拍至今晨六時,認真體力透支。而他與陳豪大前日就拍攝一場群毆戲,在台灣的鬧市基隆路光復南路口的十字位上演打鬥戲,二人力戰十多名持刀騎着電單車突襲的大漢,又劈又斬,打得相當落力。不過由於拍攝效果太逼真,一度有途人誤以為真的有械鬥血案發生而報警,搞到警方大為緊張,出動有台灣飛虎隊之稱的「霹靂小組」趕至,經過與劇組人員一輪交涉了解後,得知劇組有循正途申請才離開。
祥仔坦言近日拍攝連場打戲相當吃力,雖然台灣美食當前,縱使放肆一番,但身形都依然要Keep住,提到於市中心拍打戲時嚇親人,更有霹靂小組到場,他說:「嗰段時間已經唔係返工、放工時間,但始終喺十字路口,會有人流,監製又唔想為咗方便拍攝、怕多人而去啲靜啲嘅地方拍,我哋啲機又擺到好遠,啲刀手坐住電單車,前後夾攻我哋,真係有啲驚。」
殺手拎Kitty袋洗衫
此外,祥仔被發現不時拿着一個趣致的Hello Kitty袋周街行,似足《這個殺手不太冷》的造型,細問之下,原來他每隔兩天就會到酒店附近的自助洗衣店洗衫:「真係又平又方便,一個鐘搞掂洗衣、乾衣。其實呢個係一個好好嘅體驗,過程我覺得幾開心,因為喺香港唔會咁做,呢個幾生活化,都係我一個幾好嘅公餘節目。」

更多新聞,請瀏覽東方日報網頁:
http://orientaldaily.on.cc/