忍口忍得好辛苦！馬國明一早知鄭嘉穎喜訊

鄭嘉穎同陳凱琳（Grace）宣布有喜，唔少圈中人都送上祝福。同嘉穎拍劇集《鐵馬尋橋》而稱兄道弟嘅馬國明以短訊回覆東網時更表示一早知道喜訊添！

至於被嘉穎當係妹一般看待嘅賴慰玲就話：「係呀！好開心！Grace有同我講，兩個都係我好好朋友！見證由拍拖結婚到今日，發生好多好開心事。好替佢哋高興！希望佢哋愈生愈多啦！哈哈哈！」

而Grace好友、之前遠赴峇里出席婚禮嘅模特兒林皓霆（Charles）就話：「我都係睇佢instagram先知，我當然好開心，即刻留言恭喜佢！我諗佢好想選擇一個咁歡樂嘅感恩節去同大家分享呢個好消息。如果齊人，會約埋Grace、Anjaylia（陳嘉寶）一齊慶祝。」