集郵撞樣　張景淳獲網友讚似鄭伊健

歌手鄭伊健喺無綫台慶當晚以神秘嘉賓身份現身，掀起全晚高潮，更成為藝人們嘅集郵對象。有幸同偶像影相嘅張景淳，將合照上載到社交網站，獲唔少網友留言指佢同伊健好似樣，張景淳對此表示：「我同佢影相嗰陣，同佢講我一直都好鍾意佢，原本以為佢只係會答多謝就算，但佢同我講話有睇我做戲！我完全估唔到佢會咁講，好似對我有認識咁，真係好開心。（覺得自己似唔似伊健？）某啲角度會覺得似。」

除咗網友話似樣之外，連張景淳嘅一班《愛．回家之開心速遞》同事，例如「大小姐」林淑敏同「送水輝」許家傑都有留言，話覺得佢哋似足兩兄弟添！