打到骨折!王浩信露「骨」剖白:感到活着

20181126
東網電視
更多新聞短片
王浩信晒出露「骨」照,就連留言都好露骨,佢話做鍾意做嘅嘢,可以唔理痛楚!
藝人王浩信最近忙於為新劇《解決師》開工,有唔少動作戲,不過非常唔好彩,佢喺社交網晒出兩張露「骨」傷勢相,自爆拍打戲時受傷搞到尾指骨折,不過唔只照片露「骨」,佢仲剖白做鍾意做嘅嘢時,真係可以好博,因為佢一直捱痛,直至完成所有打戲先去睇醫生呀!
佢話發文唔係想大家擔心,係想話畀大家知佢對演戲嘅熱愛大到連痛都唔怕,原來佢仲因為受傷所以早前缺席台慶頒獎禮記招,留言:「想同大家share下(吓),經過呢件事,我發現原來我底果(嗰)浸當我面對自己鐘(鍾)意做既(嘅)野(嘢),痛都可以唔理嘅質地無(冇)被歲月沖淡,就好似以前拗咗柴第二日就落場打波嗰種熱血,仲好似比以前嚴重咗。我真係覺得幾開心,因為我感到活著(着)!為左(咗)慶祝單野(嘢),就同大家分享一張入行以來最露骨嘅相,鼓勵大家要keep住團火!」
東網聯絡上王浩信,問到佢會唔會因傷而影響之後工作,佢話:「好彩動作戲部份已經完成,文戲盡量唔好太大郁動就冇影響啦,多謝關心。手指尾骨比較弱,冇辦法啦。」