點樣識㗎？史丹利與法國名導雷奈係老死

「漫威之父」美國傳奇漫畫家史丹利（Stan Lee）本月中離世，享年95歲。史丹除了在荷里活有班巨星級粉絲之外，原來有兩位已故歐洲電影大師都係佢嘅粉絲！

發行世界各地藝術電影光碟的The Criterion Collection去年就訪問咗史丹利並拍成短片，聽佢分享50年代尾同摯友法國新浪潮電影大師阿倫雷奈（Alain Resnais）相識嘅經過。據史丹所講有日，曾拍過《廣島之戀》（Hiroshima mon amour）及《去年在馬倫巴》（ Last Year at Marienbad）等經典名作的阿倫寫信畀佢，而史丹亦即時回信，之後經過多次書信來往之後二人漸漸成為好朋友。有次阿倫在信中表示會去美國並想見他。史丹說：「我當時真係唔敢相信，心情好激動！佢喺美國住咗一排，我邀請佢嚟我屋企住。」史丹笑指同太太成日笑佢愛着紅色恤衫。後來二人合作，計劃拍一部名為《The Monster Maker》的科幻電影，後來因同投資者傾唔成而將計劃擱置。而史丹利更爆料阿倫最想都係執導《蜘蛛俠》（Spider-Man），因為他好喜愛個角色。

除了阿倫雷奈之外，史丹利亦提到有次另一歐洲名導演意大利電影大師費里尼（Federico Fellini）來到他位於紐約的公司，同行還有幾名人員。史丹表示當時秘書同佢講：「有個咩Felony（重罪）嘅人嚟想見你。」之後史丹就話：「你係咪指Fellini（費里尼）？！費里尼喺出面想見我？快啲帶佢入嚟！我相信佢係漫畫迷。」