MIRROR開騷在即　預告有激昂演出

男團MIRROR五位成員Lokman、Ian、Anson Kong、Jeremy和Tiger為跑步活動擔任表演嘉賓，獲不少粉絲到場舉牌支持兼歡呼聲不斷。

提到演唱會將近，他們指心情緊張兼狂做gym，隊長Lokman說：「我哋排緊大圍嘅嘢，solo嘅部分亦不斷練習，一陣完咗活動後都要返去練。（大圍嗰啲有咩玩？）會有深情同激昂嘅表演，仲會唱我哋嘅新歌。」問到有否意見不合？Jeremy表示大家非常熟悉對方：「喺《全民造星》時經過咁耐相處，大家都有一定程度嘅了解。」Anson亦指排新舞，大家更有相同意見，希望令整個表演更為順暢。

問到各人有沒有養聲習慣，他們則指Ian是保養專家，全因他只喝熱飲，其他亦指會喝蜜糖和少吃煎炸食品。