開騷勁減磅！羅嘉良林保怡「消費」家燕纖腰

藝人薛家燕為慶祝入行60周年，舉行一連兩場處女紅館「薛家燕愛你無限60年演唱會」，到下一部分，電視機播放着家燕參與的電視劇畫面，包括憑「好姨」一角逆轉人生的《真情》，期後換上金黑色晚裝的家燕演唱其主題曲，唱畢她感恩話劇集是人生中的一個轉捩點，並特別要多謝珍姐給予演出機會。

羅嘉良專程回港撐場

隨即邀請專程由北京飛回港做嘉賓的羅嘉良上台，甫出場他即抵死笑話終於可以攬到家燕條纖腰，並大讚對方瘦了不少，家燕即話瘦了10磅，獲全場拍手喝采！家燕憶述當年拍《富貴門》突然有重病要休息，表示是對方叫自己安心返屋企抖，不惜北京、香港兩邊飛就拍攝時間！羅嘉良又讚家燕十分勤力，大爆她為個唱昨晚練到凌晨3點，每日睡4小時。

林保怡笑家燕冇腰

待羅嘉良離場後家燕邊唱《大家姐》邊圍繞台邊同觀眾握手，眾觀眾一湧而上，非常墟冚！她更情深表示：「今晚特別感覺呢60年冇白費，今晚有好多嘉賓、好友，都係我一個電話就嚟支持我。」接邀請下位嘉賓林保怡出場，久別獻聲的他與家燕合唱《陪著你走》、又獨唱《兒女》，期間又同家燕憶當年拍攝《九江十二坊》時，有場喊戲家燕太投入谷淚，谷到甩髻，令在場演員唔知喊好定笑好，最後要NG重拍；另外再講到一齊去雲頂登台的趣事，又拎家燕條「纖腰」講笑，林保怡話家燕要求唱歌時要攬腰，但結果冇做到：「佢話要攬，咁我就搵啦，但係邊？我搵唔到條腰！」仲邊講邊加以雙手直落手勢形容，不過臨尾都有幫家燕澄清：「依家有啦！減咗肥，呢度咪係囉！」認真盞鬼搞笑！

----------------------------

東網巨星開咗ig喇，大家快啲follow啦！

https://bit.ly/2JjSVcr