倒瀉半杯奶茶！陳家樂自爆做過外賣仔

英皇藝人陳家樂日前為App拍攝廣告，廣告中他演繹「超級夥計」，仲要一人分飾三角，分別係超級市場服務員、街市售貨員及餐廳侍應，家樂在街市拍攝時，更遭一班師奶圍，勁受歡迎。這個「超級夥計」十足師奶暖男一樣，用殺死人嘅眼神「壁咚」女客人，又會飛身幫手換蘋果。

曾遇超級夥計嚇到喊

家樂表示小學時同媽媽去連鎖快餐店吃東西時都遇過超級夥計，他謂：「媽咪行開咗，我自己坐喺度食，但食到勁污糟邋遢，跟住有個姐姐走過嚟：『小朋友，你唔好食到咁污糟喎，你咁樣唔啱㗎喎。』我聽到就喺度喊，媽咪返嚟後問我乜嘢事，我話個姐姐話我食得好污糟，媽咪話：『啱呀！人哋咁話你係啱㗎！』然後個姐姐就過嚟同我媽咪講唔好意思：『搞喊你個仔。』媽咪話：『你啱呀！你鬧佢啦！佢真係好污糟邋遢㗎！』自此之後就好記得食嘢唔可以整到張枱污糟邋遢啦。」

做外賣仔時倒瀉奶茶

家樂又指當年其中一份暑期工是茶餐廳外賣仔，他謂：「有一次踩單車送外賣，踩到中途突然炒車，啲奶茶倒瀉晒，得番一半，但嗰陣時勁白痴，唔識得返去茶餐廳斟過杯，就咁將嗰半杯送去畀個客，跟住個客打去茶餐廳投訴，老闆仲以為我自己飲咗。」