突發！《復仇者4》首曝預告有齊鷹眼同蟻俠

漫威（Marvel）晒冷大片《復仇者聯盟3：無限之戰》（Avengers：Infinity War）今年上映，令全球睇足10年嘅超英粉絲陷入瘋狂，出年終於有大結局《復仇者聯盟4》，連日傳有首條預告出爐，終於香港時間今晚，漫威堅發布預告，仲有埋戲名，定名《Avengers：Endgame》，同之前網上流出傳聞一樣，預告仲有埋《復仇者3》無影嘅「蟻俠」保羅魯特（Paul Rudd）同埋「鷹眼」謝洛美維拿（Jeremy Renner），驚喜重重！

（以下內容劇透《復仇者3》結局，慎入！）

上集講到「Thanos」堅用鑲上6粒聖石嘅「無限手套」毀滅世界上一半人口，當中包括唔少超英，好似「黑豹」同埋「蜘蛛俠」等等！《復仇者4》預告由幾個初代復仇者成員擔正，一開始就有「鐵甲奇俠」羅拔唐尼（Robert Downey Jr.）疑於太空向老婆「Pepper」錄遺言嘅場面，講到自己就無命時話：「部分旅程已經完結。」佢又講到自己嘅情況嚴峻：「食物4日前已經無晒，氧氣聽日都會用盡。」

之後鏡頭轉到「美國隊長」基斯伊雲斯（Chris Evans）同「黑寡婦」史嘉娜祖漢遜（Scarlett Johansson）傾談，史嘉娜表示「Thanos」殺咗地球一半人，基斯傷感落淚：「我地失去所有人，朋友，家庭，同時亦失去我哋自己嘅一部分…呢次係我地生死一戰。」鏡頭之後有「變形俠醫」麥克韋化奴（Mark Ruffalo）同「雷神」基斯漢斯禾夫（Chris Hemsworth）等出現，悼念已化灰拍檔包括「蜘蛛俠」同「黑豹」妹妹，最搶鏡一幕就係史嘉娜去到疑似日本地方，搵到做咗浪人嘅「鷹眼」！之後佢同基斯講：「今次一定會成事！」似係講緊對付「Thanos」同埋救番大家嘅事，基斯感慨表示：「我知會（成事），因為我唔知如果唔成事的話，我可以做咩。」

畫面之後送上《Avengers：Endgame》呢個戲名，好有心思由碎片組合而成。預告之後更加送「蟻俠」保羅於閉路電視鏡頭要求基斯開門嘅場面，當中基斯問史嘉娜呢條係咪舊影片，唔知係咪爆出電影中會有時空穿越情節，而「蟻俠」呢幕亦確定已走出《蟻人與黃蜂女》（Ant-Man and the Wasp）尾段被困嘅量子領域。至於史嘉娜回應基斯時就話保羅堅於門外，相信佢會回歸與基斯作戰！而成個預告片中，暫時未見「Thanos」正面樣，而傳聞中一個救全家嘅「Marvel隊長」都未見身影。