公開徵「聖誕男友」　唐詩詠認多仔埋身

藝人唐詩詠出席《解決師》煞科宴，問到拍劇辛唔辛苦？她笑言：「一啲都唔辛苦，因為我又唔使打，又唔使畀人打，淨係畀人救，等佢哋嚟救，去到墨爾本我又淨係每日拍一場戲，可以食嘢同行街，所以好舒服。」她亦謂最正是聖誕終可放假，之後才要開工，問到聖誕去邊玩？她表示：「本身有諗過去歐洲，但又覺得有啲危險，所以留喺香港同朋友開party算。」

問到聖誕可有男仔約去玩？詩詠開心表示：「希望有啦，我都想呀。（你好心急拍拖咩？）唔係呀，因為拍劇拍咗半年，想去玩，食吓飯，呢套係拍最耐嘅一套劇，所以大家快啲約我啦。（之前同你傳緋聞嗰啲有冇約你？）好多㗎，個個都可以約我㗎，可能會見到我同好多唔同人食飯，都要同唔同人食飯。（有冇啲係啱㗎？）食吓飯先囉，朋友都要食飯先㗎，我唔介意㗎。（你係咪第一次咁公開叫男仔同你食飯？）係呀！我真係好耐冇出過街啦，真係好想出街，我好快就要拍劇，大家聖誕節快啲約我，哈哈。」