點先令佢收聲？張頴康質馮盈盈食鼻涕紙巾

藝人張頴康出席新劇《解決師》煞科宴，講到他之前發文表示被拍檔馮盈盈搞到職業性失聰，但今日盈盈未有到場，問他耳仔好番未？他說：「抖咗幾日好好多啦，佢真係太嘈，我同監製講下次都係唔好再同佢做情侶，其實講笑啫，佢同我哋男仔堆好開心，講嘢唔使避忌，有佢喺度唔怕講核突嘢，因為佢更核突。」

他又笑指頂盈盈唔順：「有一次拍戲要車佢入去赤柱，佢沿途係咁講有咩餐廳好食，我有張呻完鼻涕嘅紙巾喺隔籬，即刻想塞入佢個口，頂佢唔順，之後佢就靜咗3分鐘，然後就喺車播佢想聽啲歌。」講到無綫除她外，還有劉佩玥及江嘉敏兩大「嘈音」，張頴康表示：「唔夠馮盈盈犀利，馮盈盈係冠軍，劉佩玥係會識收手，而江嘉敏雖然化妝間都會聽到佢把聲，但佢唔會搞同事，但馮盈盈破壞性非常強。」

問到他可會怕囡囡好似盈盈咁嘈？他表示：「有次佢同個女講，問佢第時大個想唔想好似佢咁選香港小姐，我心諗如果我個女好似佢咁，我一定唔會畀佢選港姐。」但問到跟盈盈可是合作愉快？他謂：「愉快。（入行最難纏嘅對手？）唔係，佢係搞事啫，但佢心地好，又鍾意嘻嘻哈哈！」