同初戀結婚!從一而終愛到底

20181208
東網電視
更多新聞短片
係愛呀!
初戀往往都係最刻骨銘心,不過就未必每段戀情都能夠走到最後。但其實娛樂圈中有唔少明星與初戀最終開花結果,婚後生活幸福美滿,令人羨慕。
吳尊
被網民封為「絕世好男人」嘅吳尊,16歲時對老婆林麗瑩一見鍾情,後來進入娛樂圈,以組合「飛輪海」出道。但為咗唔影響男方事業,二人於2009年喺汶萊秘密註冊結婚,而林麗瑩行事亦非常低調,甚少公開露面,甘願做吳尊背後嘅女人。吳尊於2013年坦承已婚生女,第二胎亦即將出世,當時消息震驚中港台娛樂圈。先前佢仲帶一對仔女Neinei同Max,參與大陸綜藝節目《爸爸去哪兒》,暖爸形象深入民心。夫妻相愛23年始終如一,一家四口樂也融融,猶如童話故事。
陳嘉寶
藝人陳嘉寶(Anjaylia)23歲女先至第一次拍拖,於教會認識大佢八年嘅初戀男友黃頌祈,繼而撻着。由於二人同樣係虔誠基督徒,一直保持有愛無性嘅關係。兩人拍拖四年最終開花結果,於上年11月步入教堂,攜手步入人生另一階段。結婚不足一年,即傳嚟好消息,Anjaylia喺社交網宣布有喜。
王君馨
「處女黨」成員嘅王君馨(Grace)17歲時喺美國認識圈外男友Daniel,男友都係虔誠基督徒,堅拒婚前性行為。深受初戀男友影響嘅Grace即使分手後,嚟到香港發展都一直守住處子之身。喺2013年佢同Daniel復合,經歷11年異地戀,最終修成正果,於上年六月喺美國教堂行禮結婚。婚後Daniel為咗老婆能繼續於娛樂圈工作,不惜放棄美國事業,選擇來港發展,同Grace組織幸福家庭。
莫文蔚
歌手莫文蔚(Karen)17 歲時於意大利讀書認識德籍男友Johannes,但相戀一年後因各自要回國,令戀情無疾而終。相隔24年後,Karen到柏林拍攝電影時,與初戀男友再次相遇,重燃愛火。異地戀一年後,Karen喺2011年金曲獎頒獎禮當晚,奪得「最佳女歌手」,佢更喺台上突然宣布結婚喜訊。當時Johannes經歷過一次婚姻失敗,更育有3個仔女,但Karen坦言完全唔介意做後母,更表示能夠同初戀再續前緣,已經係最美好嘅事。兩人婚後甜甜蜜蜜,二人於上年為慶祝相識30周年,更喺英國倫敦王宮舉行華麗派對。
陳慧琳
樂壇天后陳慧琳(Kelly)於1992年喺美國留學時認識圈外男友劉建浩,期間曾分手一年半後,再度復合。Kelly出道23年幾乎零緋聞,當年佢喺事業如日中天時,選擇於演唱會上宣布與初戀男友結婚,結束長達16年愛情長跑,轟動整個娛樂圈。二人喺2008年拉埋天窗,婚後陸續誕下兩個囝囝「蝦餃仔」劉昇同「小籠包」劉琛,Kelly並為家庭逐漸放慢工作步伐,希望將更多時間放到照顧兩個囝囝身上。