隨緣爭視帝　張衞健最想攞嘅獎竟然係…

藝人張衛健（Dicky）、楊秀惠、譚凱琪、蔡思貝、洪永城等人出席「《大帥哥》之徵兵大會」，期間在台上寫低最想攞的獎時，Dicky竟寫上「最佳新人獎」，並對此表示：「我第一次入將軍澳電視城拍劇，仲唔係新人？」

講到之前與老婆張茜去南非旅行，Dicky大讚旅程好正：「同太太計劃咗好耐，係我哋嘅心願之一，因為佢好鍾意動物，乜動物都會話好得意。（有冇「造人」？）喺呢個原始大地，係咪要做番啲人類最原始嘅娛樂活動，或者傳宗接代嘅責任呢？不過都係唔講呢啲喇。」他又表示難忘在當地食足7晚燭光晚餐：「因為酒店安排埋，冇得走，依家見到蠟燭都驚。」

獲提名感驚喜

講到在旅程當中突然獲提名《萬千星輝頒獎禮》的「最佳男主角」，Dicky表示：「嗱！我咁大個仔都未攞過任何演戲嘅獎，呢樣嘢都慣咗，只要喺觀眾心目中，我係半個視帝就已經好開心。（覺得套劇未上已有提名好奇妙？）唔知啲機制係點，不過拍咗咁多年，喜劇都係難攞獎啲。（想唔想攞？）我記得我有首歌，應到不得了，第一句嘅歌詞就係『人人拿大獎得我沒有』。」

集體回憶

問Dicky可會出席頒獎禮？他表示不知道個期怎樣，但都很開心劇集播出反應很好，內地的點擊現時已有七千六百萬。講到有觀眾對他演出評價好壞參半，有指他食老本，講番以前的經典對白，他表示：「幾句啫，呢個係我同觀眾隔空嘅集體回憶，都係用咗兩、三段啫，好多朋友聽番都話開心感動，最想大家睇到我哋嘅付出同心血。」問他對獎項可有勝算？他表示：「我冇簽約TVB喎！我認命、隨緣啦。」