愛心爆棚!梁嘉琪恨搵拍檔搞義工團隊

2018年12月08日 17:53
東網電視
更多新聞短片
梁嘉琪連續三年出席作文比賽頒獎典禮活動。

藝人梁嘉琪出席作文比賽頒獎典禮活動,喺台上孖魔術師表演魔術之餘,又派氣球畀現場小朋友。講到嘉琪已經連續三年出席活動,問酬勞係咪加唔少?佢話:「真心唔知,我鍾意出席有關小朋友嘅活動。我自己覺得寫作係一件好自由嘅事,今日見到小朋友好感動,因為我覺得呢個年代嘅小朋友識寫字㗎咩?佢哋多數都係拎住個電話同平板電腦。(你讀書時作文好叻?)唔敢話好叻,但會畀老師貼堂同拎獎。我自己好鍾意啲創新嘅題材,覺得對演戲都好有幫助。」

講到聖誕節將至,嘉琪透露會去開聖誕派對,仲話早前同一班行動不便、需要幫助嘅51個家庭去旅行,做義工嘅過程感受好深:「當中有弱智同埋唐氏綜合症人士,去之前都有諗過用咩方法同佢哋溝通,但其實只係同普通人一樣。」平時做咁多義工,問會唔會考慮成立義工團隊?佢話有考慮過:「但成立唔係一件容易嘅事,睇吓有冇志同道合嘅人同我一齊搞。」