為拍戲做男一!龐景峰放棄最重要嘅女人

2018年12月08日 23:00
東網電視
更多新聞短片
龐景峰終於有得做男一。

藝人龐景峰出席時裝活動,佢話嚟緊將會擔任電影男主角,但卻因為拍攝時期撞正媽媽郭秀雲生日同埋聖誕節,所以唔可以同生命中最重要嘅女人過節:「好開心終於做男主角,今次電影中我係要武打嘅,拍攝時間由12月20日拍到下年1月中,而我媽媽喺20號生日,所以冇得一齊慶祝,惟有提早。(媽媽有冇投訴?)冇,媽媽聽到我做男主角好開心。(聖誕節亦唔可以同女朋友過。)我已經準備咗聖誕禮物畀佢,但女朋友詐晒型,惟有叫佢上嚟橫店探我班。(咁咪好凍?)係呀,最暖十度、最凍得四度。」佢仲笑言為咗呢件事已經跪緊玻璃。

講到好友吳卓林已返港並結婚,佢話知道呢件事,仲已經Send咗Message恭喜佢:「不過我覺得19歲呢個年紀太早結婚,不過就算同性婚姻同異性婚姻,我都係好同意。(佢有冇覆你Message?)有。(遲啲約佢出嚟見面?)我嚟緊都忙拍戲,都冇乜咁多時間。」

至於依家免費開班教授Spartan Race(斯巴達障礙賽)嘅佢,話仍然有Keep住開班,高峰時期會有30個同學:「最印象深刻係有一對父女嚟上堂,因為爸爸好耐都冇郁,有啲動作做唔到,要靠囡囡幫佢拉筋,咁樣增加佢哋嘅回憶,我覺得好開心。」



----------------------------
東網巨星開咗ig喇,大家快啲follow啦!
 https://bit.ly/2JjSVcr