全家總動員幫手!毛舜筠踩過界賣曲奇分享愛

2018年12月09日 00:00
東網電視
更多新聞短片
影后毛舜筠踩過界賣自家品牌曲奇!

金像影后毛舜筠最近踩過界賣自家品牌曲奇!孭住「法國藍帶」廚藝之名,花了一年多時間研究配方,為的並非與同行鬥餐死,反而欲透過食物分享愛,不諱言今次大計也是全家總動員參與,上至設計包裝、下至曲奇名字也是家人眾志成城,為了追夢確實花費不菲,但毛舜筠認為值得。

無心插柳讀法國藍帶

於娛樂圈逾40年的毛舜筠,演技早已被肯定,3年前無心插柳到法國讀藍帶廚藝課程,繼而展開對廚藝追求的夢想,過程間因辛苦曾多次想放棄,但最終仍克服困難,再到日本、巴黎經歷種種考試,最終完成三個學期、通過無數次考試,搖身一變成為了法國藍帶廚師。

為設計爭拗無損夫妻情

此後毛舜筠對食物質素要求開始提升,經常為家人炮製糯米糕、糯米糍、曲奇等小食的她,萌生做曲奇生意的念頭,結果便埋手計劃,花了一年多時間研究,舖頭亦於本月初開張。對於曲奇的要求,毛舜筠認為首要是材料:「我發現用好材料、足材料同方法啱就會好味,顏色亦最緊要多,所以我就研究咗8款唔同顏色嘅曲奇,好似有紅菜頭、紫薯、抹茶、咸蛋黃曲奇等。」包裝方面就交由美指老公區丁平負責,毛舜筠笑指基於老公藝術家性格,慢工出細貨搞到遲遲未交貨,所以夫妻間不時為設計一事爭拗,幸仍無損恩愛感情。

只想保持食物高質素

面對同行如謝霆鋒、鄭欣宜、謝寧等也相繼加入賣曲奇,當中後者更賣到上市,問到如何突圍而出?毛舜筠表示沒有多想,亦沒有要超越別人,只想保持食物高質素,透過食物向身邊人分享愛:「市面上大部分都係代言人,我就係始創人,老公係曲奇設計師,成件事係家人參與,舖頭係親戚擁有,當然要交租,曲奇個盒同包裝係老公設計,囡囡做試味,姨甥仔幫曲奇改名,我個曲奇整大Size都係想大家同家人一齊分享呢份愛。(成件事用咗幾多錢?)唔講錢啦,總之為完成呢個心願真係用好多錢,但我都想繼續去學,學海無涯嘛!」

攝影:劉斌
場地:Mustard Seed Co-working Space

----------------------------
東網巨星開咗ig喇,大家快啲follow啦!
https://bit.ly/2JjSVcr