太空總署都出口！漫威粉絲求NASA救鐵甲奇俠

漫威（Marvel）日前突發公開晒冷大片《復仇者聯盟4》（Avengers：Endgame）初版預告，單日錄得2.89億點擊次數，成為史上首日最多點擊預告片，威到爆燈，近日仲連美國太空總署（NASA）都幫口宣傳！

話說「鐵甲奇俠」羅拔唐尼（Robert Downey Jr.）於預告中在太空漂浮，斷水斷糧向老婆「Pepper」桂莉芙白德露（Gwyneth Paltrow）錄遺言一幕，令唔少粉絲肉都赤埋，除於導演羅素兄弟（Russo Brothers）社交網留言，希望導演手下留情，唔好整死羅拔，更玩到去NASA的官方社交網，求NASA用佢哋嘅資源拯救羅拔咁話，認真度奇高，留言相當搞笑！

而面對電影粉絲入晒戲踩場，NASA亦無冷待，更一於奉陪到底，標籤漫威電影公司兼留言認真回應：「你好，漫威，我們聽過有關Tony Stark（鐵甲奇俠）嘅事，你們第一件要做嘅事就係於任務控制中心聽吓有冇『Avengers，我們有麻煩。』嘅求救信號，但如果佢唔（鐵甲奇俠）能夠溝通到，我們建議地面團隊用盡所有資源去搜尋你哋於天空中失蹤嘅成員。」

唔少漫威粉絲大讚NASA玩得，更發現佢哋留言附上嘅控制中心圖像中，當中一個「Thor」（與「雷神」同名）嘅名牌旁邊，放上一個「雷神」槌！NASA留言解話話呢個部門全名係「THERmal Operations and Resource（THOR）」，負責確保太空站子系統嘅運行，於太空任務中好重要！