胡㻗羅天宇為母慶生　阿媽似足家姐！

早前前港男胡㻗被東網獨家拍得到與前港姐劉穎鏇摸黑「車震」而一夜成名，今日佢就喺社交網上載與同母異父的哥哥羅天宇為媽媽慶生的合照。眾所周知，胡㻗爸爸胡越山曾經是無綫力捧小生，哥哥是前港男冠軍羅天宇，媽媽喺佢2歲大就離婚，照片所見，經歷甚多的胡媽媽，個樣仍然勁後生，佢坐喺兩兄弟中間，戴住Cap帽及大耳環、潮味十足，一啲都唔似係兩個大男人嘅媽媽，話家姐都有人信！而網友都話胡媽媽有星味添。

羅天宇接受東網訪問，佢話今次份禮物行心意路線：「之前試過送花同戒指等，佢（胡媽媽）都叫我哋唔好嘥錢，所以今次我就整咗個蛋糕送畀佢。本身係兩兄弟一齊去學整，但最後因為細佬要做嘢，所以就變咗我自己一個去整，加咗媽咪鍾意食嘅配料，有朱古力同粉紅色嘅糖，仲加咗啲玫瑰花瓣喺蛋糕上面，所以佢收到都非常驚喜。」