入劇組零交流　楊千嬅自爆打招呼冇人理

第三屆澳門國際影展暨頒獎典禮今日在澳門文化中心閉幕，電影《麥路人》的一眾演員楊千嬅、郭富城（城城）、顧定軒、劉雅瑟在當地舉行記者會，並公開電影預告片。千嬅透露自己飾演廟街歌廳內的歌手，更因該電影而接觸到本地文化：「郭富城嘅經理人小美邀請我拍呢部戲，佢話有個劇本好好但好急，佢用咗15分鐘同我講，跟住我就好匆忙咁入組。套戲好沉重，第一日入組好緊張，個個都唔同我講嘢，我平時好樂天，見到大家就會講早晨，但個個都頭耷耷冇乜反應，一踏入個場就投入咗，搞到我自己都好sad。」

談到首次跟城城合作，千嬅覺得是緣分，問會否因劇情沉重而影響情緒？她坦言：「都有啲低落，城城入晒戲，喺佢身上學到嘢，佢好專業同認真，同佢合作好難得。（會唔會脫離唔到個情緒？）唔會，因為我老公同個仔係我嘅人生鬧鐘，我任性或者好疲累，佢哋就會叫番醒我。」

投古天樂一票

提到音樂頒獎典禮，千嬅表示因為今年冇歌，所以不會出席，但表示會支持古天樂奪「我最喜愛的男歌手」獎：「我睇好佢，會投佢一票，我以前同佢合唱過，2000年喺個慈善活動上唱咗首慈善活動主題曲叫《萬語千言》，佢唱得好好，我都唱得有啲飄飄哋。」