啱啱坐完月！栢芝為仔仔出關去聖誕旅行

藝人張栢芝前日（17日）承認上月已誕下第三胎，剛剛坐完月嘅佢仲公開細仔乳名叫「小王子」，不過佢仍未有公開誰是BB父親。不過東網就收到讀者爆料，指今早在香港機場偶遇栢芝一家人，估唔到栢芝一出得關就第一時間帶埋大仔Lucas同二仔Quintus出埠旅行，趁有聖誕假期齊齊去玩，非常疼錫仔仔，而其弟張豪龍一家三口亦有同行。

佢哋一行多人現身機場，一身橙衫打扮嘅栢芝短打上陣，無懼入風照樣晒腿，型格打扮非常吸睛，引得機場人員都要捉實佢合照。讀者續指眾人最後步行至飛往新加坡的櫃位，不過就全程未見「小王子」蹤影，唔知栢芝會唔會係想保護「小王子」免曝光，所以細仔由第二個閘過關？

雖然今次栢芝帶埋仔仔一齊飛新加坡，不過佢昨日就透過工作室否認BB爸爸係外界盛傳嘅新加坡65歲商人及內地商人孫東海。