聖誕歎大餐　劉思希晒派對相自嘲變豬

又到聖誕，好多人都會相約開P共度佳節，藝人劉思希（Lisa）都唔例外！佢喺社交網晒出多張派對相，原來佢去咗歎西班牙大餐，有西班牙火腿、烤牛扒、西班牙餡餅及寬條麵等，睇到人流口水。Lisa留言：「今個聖誕節~～好高興去其中一個同學仔屋企參加聖誕節party！還有好多新朋友！因為同學仔係西班牙人，所以有好多西班牙美食，你們負責燒，我負責食，我應該係最能吃的女同學了…宣布已胖成豬，大家聖誕節快樂啊！」網民就話聖誕咁開心，食多啲都唔緊要！