【撐紀念展】江欣燕曾「跪拜」梅艷芳

藝人江欣燕出席「那些年，我們一起追過的梅艷芳」紀念展，她透露讀中四時去睇「勁歌總選」，當時阿梅穿上白西裝獻唱，而她亦趁廣告時段找張國榮及陳百強影合照，江欣燕謂：「見仲有時間剩諗住同阿梅合照，點知行行吓畀條線kick到，仆咗喺佢面前，張國榮見到就同阿梅講『佢拜你喎』，但阿梅就叫我起身先，仲同我影番合照。」而江欣燕入行後，更有幸加入唱片公司成為阿梅師妹，有次她與阿梅閒聊時談起此事，發覺對方仍記得這事件，令她非常驚訝。

談到與阿梅的難忘事，江欣燕表示有次飛巴西為對方音樂特輯擔任嘉賓，於當地逗留兩星期，對阿梅了解更深，她謂：「阿梅好錫家人，有次叫我去佢媽咪生日會，當時我開始扮緊佢，好驚畀佢啲粉絲打。同埋有次我哋喺化妝間撞到，佢見我補妝，於是問我做乜，我話去拍拖，佢叫我應該要落妝，以真面目見男友先得。」

至於展覽會一連三日舉行，製作費約五位數字。現場擺滿阿梅的相片、電影海報、劇照、雜誌封面等，當中照片以10港元義賣，所得之善款將扣除成本捐慈善機構。