孖阿田天台捱凍拍劇　羅天宇望明年做樓奴

藝人羅天宇與田蕊妮為無綫新劇《她。她。她的少女時代》開工，聖誕與元旦節也未能放假，飾演健身教練的天宇，特別為角色操弗身形，笑指今年聖誕也僅以白烚雞肉、烚菜及烚蕃薯慶祝：「為角色日日都要食得好清淡，就算聖誕節都唔可以破戒，除咗戒口，一有時間就要去打籃球同健身，絕對唔可以偷懶。」

而天宇於平安夜當日拍攝一場與阿田於健身室天台傾偈戲份，由於地方近海，所以特別凍又大風，他謂：「好彩我同阿田都有外套，我有西裝褸都夠暖，第一次咁凍同阿田平安夜開工幾特別，幾sweet。（同視后阿田合作大壓力？）直情高難度，佢演技太好，完全感受到阿田能力同演技，明明自己同佢做緊對手戲，但會畀佢嘅演技吸引跳咗出嚟，變咗觀眾欣賞佢做戲，好似表演緊咁，好難投入自己角色，所以好享受同阿田一齊拍戲，學到好多嘢，唯一難度係專注自己角色。」談到2019願望，天宇表示望努力搵錢及儲錢，可以上車買樓，給家人一個舒服安樂窩。