隨時撻着！Dry爆麥明詩狂見前港隊單車手

藝人麥明詩下午現身銅鑼灣，為「永年士多」分店剪綵擔任嘉賓，吸引大批途人圍觀，而其兄麥明山更同女友到場支持。麥明詩親自下煮麵及賣麵，場面熱鬧。問到她可有考慮做生意，她笑謂：「冇，做飲食好困身，留番畀啲專業人士。不過呢排我積極增肥，食好多嘢，嚟緊要用廿幾日踩單車去柬埔寨拍節目，要儲定的脂肪。我唔知可唔可以完成全程，好彩有back up車，我會帶定多啲乾糧，因驚水土不服！」

同前港隊單車手有「火花」？

她又指近日正跟隨前港隊公路單車車手、2008年奧運男子公路單車賽得第88名的胡健燊操車，笑言不排除擦出「火花」的可能：「我哋見得好密，一星期操兩、三日，依家係朋友。（係你嗰type？起碼頭髮唔亂？）佢戴住頭盔喎，我唔知道。（問清楚有冇另一半㗎？）婚姻狀況係單身嘅。」她坦言一月中出發，分分鐘要過完年才返港，行程相信艱辛。

舊愛全祼唔驚訝

至於舊愛林作日前全祼拍照賀生辰，麥明詩表示：「佢不嬲都好有『激』嘅潛能，我唔覺得驚訝。（拍拖時試過類似行為？）咁印象中又冇。」