傷腳考演技!黃宗澤坐喺度急步行笑死網友

20190102
東網電視
更多新聞短片
Bosco今次真係演技大考驗!
藝人黃宗澤(Bosco)早前拍攝邵氏網劇《飛虎之雷霆極戰》時整傷左腳,雖然日前已經復工,但都仲要包住石膏同撐拐杖,而因為Bosco行動不便,所以部分動作戲由替身拍,之後再補佢嘅上身近鏡。咪以為聽落好輕鬆呀,其實咁樣反而係演技大挑戰!
「我真係唔識演」
呢日Bosco就喺社交網分享咗段拍攝花絮,見佢神色凝重咁坐咗喺度,由工作人員推嚟「行」,Bosco個膊頭仲郁吓郁吓咁,但拍拍吓就忍唔住大笑!到底做緊咩呢?佢就留言解畫:「導演,一個不良於行嘅人,點樣好急咁行?我真係唔識演!」佢嘅爆笑演出令黃翠如、鄭希怡等藝人朋友都留咗啲笑到喊嘅emoji公仔,更有網友話「笑到有腹肌」、「睇咗十次仲笑得出」。不過亦有網友話其實遮住一半畫面,淨係睇上半身都真係勁似好急咁行,大讚Bosco好戲呀!
今日Bosco再更新社交網,分享咗一張同苗僑偉(三哥)嘅自拍,仲留言話2019年第一張selfie,當然要同佢最愛嘅三哥影。咁識賣口乖,真係抵三哥咁錫佢呀!
----------------------------
東網巨星開咗ig喇,大家快啲follow啦!