嚴崇天出處男作　Aka鄧健泓有義氣力撐

前有線主播嚴崇天（阿天）最近推出處男小說《像雪一樣紅》，仲喺今晚舉行發布會，阿天透露新書由十年前已經開始構思，但正式動筆就係呢半年嘅事。故事講述一名香港年輕人去北京讀書識咗個女仔，然後跟對方返中國北極村鄉下，由於當地有好多傳說，所以兩人之間發生好多不思議嘅事。

向來圈中人緣甚佳嘅阿天獲得好多藝人朋友支持，組合Super Girls成員Aka仲為佢嘅小說畫封面，令佢大為感動，阿天表示：「出書過程中，好多藝人朋友幫手，例如Aka幫我畫封面，本身佢係我最好嘅朋友，喺呢行認識最耐，我一諗住出小說，已經搵佢幫我畫，知佢畫畫好叻，之前佢都開過畫展。」

另一位好友鄧健泓亦為佢寫序，阿天透露：「我邀請佢寫序時，佢一口答應，仲話『得，唔使講咁多，幫你寫！』寫序好麻煩，要睇晒成個故事，但佢寫得好好，佢太太石詠莉亦好支持我，除咗佢哋外，黃芷晴都有畀意見我，有位前輩仲已經內部認購我20本新書，好感激。」