男友讚演技好咗　李佳芯勁開心：陣間打畀佢

藝人李佳芯下午到紅磡出席賀年活動，席間需要獻唱，她自言近日躲在家中練歌：「首歌好新，所以我匿喺沖涼房練。媽咪話我有呢鋪習慣，細個練琴一樣匿埋，應該係怕醜。」記者笑她性格如此，為何入行？她笑說：「緣分啩，其實依家我都會面紅。以前唔鍾意講嘢又唔鍾意同陌生人接觸，隔籬位同學仔笑我冇聲音同冇體溫，依家拓闊咗我嘅人生。」

未去過男友屋企拜年

問到陳炳銓讚她演技有進步，佳芯開心地說：「佢未喺我面前讚過我，佢係前輩、又係專業，仲要同記者講，我梗係開心啦，陣間打電話問吓佢先。」

談到即將到來的農曆年，她笑言：「4月先有劇開，依家忙活動同綜藝節目，初一應該有假放，睇吓公司有冇安排。（去陳（男友陳炳銓）家拜年？）我媽咪都姓陳喎，哈哈！我又真係未去過佢屋企拜年，通常都係約出嚟食飯。（佢去你屋企？）佢都未嚟過拜年。（咁陌生咩？）我未帶過異性返屋企拜年。（佢會係第一個？）唔知喎。」