催促買家落單　毛舜筠整完餅先可以度歲

藝人毛舜筠現身關注罕見病的慈善活動，自言之前拍畢關於自閉症的電影後，對罕見疾病有更多了解，發現以前自己很膚淺。問會否建議老闆多開拍有關罕見病題材的電影？她說：「其實依家都好多人開拍呢類題材，我唔會局限自己只係拍呢類電影，所有有意義嘅電影我都會拍。」

問聲音沙啞的原因？毛舜筠表示患上感冒，現已逐漸康復，前天完全失聲：「我大女係教書，佢接觸小朋友時染上感冒，我喺11月已經打咗流感針，後來一家人去旅行，大女傳咗畀細女，旅行最後一日傳埋畀我。（老公有冇被傳染？）佢日日呻話中招，我去睇醫生時已經幫佢攞埋藥，我同佢講你真係病先好食，唔係唔好食。」

提到農曆新年，她稱計劃好溫泉之旅，但要忙完自家餅店的新春禮餅才能動身：「我會盡量預備多啲，唔想唔夠賣，但因為係人手造，所以造唔到太多，我叫人盡快訂，因為愈早訂，我愈早做完，咁就可以去旅行。」