可嵐開大灣區巡唱　預告有大嘢

歌手可嵐和音樂人好友潘敬祖齊出席假葵涌舉行的慈善活動，可嵐指去年舉行的處女演唱會反應好，近日有贊助商傾她開內地巡迴演唱會：「會喺大灣區做三至四場，嚟緊會喺佛山、珠海及澳門開騷，所以農曆年只可以帶囝囝返鄉下探親幾日，之後預留時間搞演唱會啲嘢。（巡唱可加新元素？）有大嘢，因為我唱咗內地劇兩首劇集歌，到時會唱呢兩首歌，希望今次會爆啦。」

她感謝潘敬祖帶挈，除幫她接工作外，又助她教仔：「我8歲大嘅囝囝近期情緒好波動，好在有佢幫我輔導個仔，做單親媽媽真係唔係咁易。」潘敬祖估計可嵐囝囝可能想吸引媽咪注意，才表現得較反叛。