RubberBand開行Turbo繼續寫歌

樂隊RubberBand（RB）各成員以牛仔Look出席香港首屆牛仔節，更一連大唱四首Hit歌，十足十開小型音樂會！成員阿偉表示好Enjoy今次演出，問到2019年再有計劃開騷？RB指上半年主要集中火力於澳門的3月巡演，之後會開Turbo繼續寫歌、創作。

講到大會牛仔服飾主題，四子表示都好鍾意着牛仔褲，各人亦收藏了不少款式，其中成員阿正自嘲因為肥咗，所以有好多條牛仔褲都唔啱着，並表示會做運動減肥，身旁的泥鯭及阿偉即加把口大爆料：「佢係成日做運動、去滑雪，但亦都不停喺滑雪場隔籬啲地方食嘢，即係大雪得滯咪去食嘢先囉！」被篤爆的阿正尷尬笑話：「咁叻嘅你哋，講啱晒！」