擅加同張文慈咀戲 尹天照:錫一啖啫

2019年01月14日 01:54
東網電視
更多新聞短片
太熟拍親熱戲係會尷尬!

藝人尹天照、張文慈及何英偉等昨晚到旺角出席主演福音電影《奇蹟·13》的煞科宴。阿照與文慈相識多年,終於在該片內扮演夫婦,談到文慈曾表示與阿照拍親熱戲似亂倫,阿照笑答:「我有睇到,都唔算好親熱,錫咗一啖啫,劇本冇嘅,不過大家又唔係第1日出嚟拍戲。」

阿照最難忘是其中一場潛水戲,要求他水底除下氧氣罩扮遇溺,要拍檔何英偉拯救。而阿照本身受過傷耳膜已穿,加上水壓種種,令情況相當危險,他更笑謂:「都真係會死㗎,當晚又好凍喎。件潛水衣緊到除唔到,最終我同何英偉匿喺洗手間度互扯先成功除甩好Hehe。」

至於文慈則剛從台北旅行返港:「一去到就發高燒,依家傳染埋同行嘅家姐同姐夫,我做完嘢要睇醫生。」戲中她被巴士撞倒,本來一場嚴肅戲卻變成笑料:「架巴士駛埋嚟真係好貼,出於本能反應我走開,後尾醒起就S形兜返埋去,咪畀佢哋笑我囉!」而該片後期有大量特技畫面,大隊計劃上映時會到韓國舉行首映禮。

----------------------------
東網巨星開咗ig喇,大家快啲follow啦!
https://bit.ly/2JjSVcr