做評判學到嘢　邱芷微不斷裝備自己

歌手邱芷微（Chelffy）近日到深圳為一個歌唱比賽擔任評判和表演嘉賓：「今次我都係首次擔任評判，發現好多香港青年嚟內地參加比賽，同國內青年一較高下，大家表現都非常出色，希望佢哋參加比賽可以擴闊視野，亦搵到自己嘅舞台追夢。」

Chelffy指今次做評判亦係一個好嘅學習經歷：「我覺得每個人都有佢嘅長處，所以我嘅評分標準就係只要能夠有勇氣同自信企喺台上唱晒全首歌，選擇適合自己嘅歌，冇走音，拍子準，亦冇漏歌詞同觀眾有互動等，其實已經合格。最緊要都係要畀觀眾睇到你係enjoy同尊重個舞台。」又表示見到啲參賽者，令佢回望過去經歷，並認為依家做歌手好難，所以要不停裝備自己。