退選港姐「弗版楊洛婷」做完Gym趕結婚

有「弗版楊洛婷」之稱嘅退選港姐吳佩倫（Mandy）參選2015年港姐，憑住樣靚身材正成為風頭躉！雖然第二輪面試後就宣布退選，但係Mandy從不吝嗇美好身材，不時喺社交網上載靚相派軍糧，早前Mandy宣布訂婚，今次佢仲自爆已經嫁咗人喇！

Mandy喺社交網上載咗同老公咀嘴合照，二人身穿運動衫，喺簡約白色鮮花布置場景行禮，Mandy留言：「We randomly got married after gym today. We didn’t have a plan, no appointment, no makeup, no fancy dress, no ring.（我們健身後隨意地結婚了。我們沒有計劃，沒有化妝，沒有華麗服裝，沒有戒指。）」佢話之前一直計劃喺香港、台北及夏威夷舉行婚禮，而最後決定喺夏威夷及台北兩地舉行，所以當日以運動造型行禮，Mandy話諗都冇諗過！

早喺去年9月，Mandy已經晒出巨鑽宣布訂婚，佢仲晒出同老公浸溫泉時被求婚嘅三點式火辣錫錫相添。