想向偶像致敬 陳國峰入行10年首開個唱

2019年01月14日 15:10
東網電視
更多新聞短片
Penny話要排舞向郭富城致敬!

參加無綫歌唱節目《超級巨聲》入行的藝人陳國峰(Penny)舉行首個個唱發布會,他受訪時坦言心情緊張,問到如何促成是次個唱?他表示:「要多謝《流行經典50年》,多謝家燕姐(薛家燕)同小田哥(黎小田),我上咗去節目後有好大回響,於是有人搵我開今次個唱。我入行差不多10年,一直做住同唱歌無關嘅嘢。(個唱有咩特別表演?)希望抽到時間去排舞,由細到大都好鍾意郭富城,想向佢致敬,所以會跳唱佢嘅勁歌熱舞。我會盡量練好啲,睇吓搵唔搵到郭富城嘅排舞師Sunny Wong去排舞。(會唔會請郭富城嚟睇?)我都想,試過搵,但未必得,佢可能太忙。(到時會唔會騷肌?)大家會唔會睇到厭?如果大家想睇,徇眾要求下我可以除。」

Penny指入行以來出過4首兒歌,笑言會在演唱會上唱這幾首代表作,而一眾《兄弟幫》的主持也會上台助陣:「佢哋好鍾意跳舞,上次我哋一齊上船登台都係唱郭富城嘅《對你愛不完》,就係由林盛斌負責排舞,我哋好認真,每個動作都研究咗好耐。(會唔會想請家燕姐?)會請佢嚟睇。(請佢上台跳十字舞?)當日好隨意,因為舞台同觀眾席近,隨時可以請佢哋上台。」