古巨基開騷搵子華神做嘉賓:想請埋古仔!

2019年01月14日 15:14
東網電視
更多新聞短片
基仔請大家免費搭車~~~

歌手古巨基(基仔)宣布4月11至12日假紅館舉行《古巨基-我們世界巡迴演唱會香港站PART2》,受訪時,他重提開記者會的費用,包25架紅Van請市民免費搭車,更坦言包車花費了20萬港元:「兩條路線盡量覆蓋港九新界,又要包車身,所以預算比起喺酒店舉行記者會仲要高,但用得更有意義。」問到會否扮乘客上車玩Surprise兼唱埋歌?基仔大賣關子笑言有機會「亂入」:「我私底下都好耐冇搭過小巴,2年前拍戲就做過小巴司機。」

講到演唱會Part 2的不同之處,他透露歌單及製作上會加入新元素,更特別預告舞台會有大改動,因他去年開騷時不慎墮台受傷,他表示:「大家應該仲記憶猶新,上次想開多啲觀眾席,所以當升降台降落嚟,只係得1尺多嘅通道,經過上次意外,今次就同公司講Cut一行觀眾席,加闊通道3尺。(會唔會預多少少時間踩台?)當然踩台時間愈多愈好,今次一定會加倍小心同提高警覺性,開騷前都會注重身體,自己都習慣戴口罩。」

至於嘉賓方面,基仔興奮指早有目標人選:「想請黃子華,因為上次開騷撞正佢閉關準備棟篤笑,就唔搞佢,今次Part 2想請佢嚟。(已經邀請咗佢?)未開口㗎!希望大家一齊集氣!」問到可會請叱咤「我最喜愛的男歌手」得主古天樂做嘉賓,「雙古」同台演出?他笑言首先要多謝對方幫手拍片宣傳演唱會:「上次佢係以『五虎』形式嚟,今次可能問吓佢可唔可以以個人形式上台唱歌,佢攞咗獎就梗係要嚟我個演唱會。」

講到門票明日正式公開發售,基仔指今次賣飛會採用政府的新措施:「第一日淨係網上賣飛,第二日先至可以喺門市售票處賣。(你覺得新措施有冇效改善黃牛飛情況?)最好嘅方式仲要時間慢慢去探討,但新嘅賣飛方式係一個進步。」

----------------------------
東網巨星開咗ig喇,大家快啲follow啦!
https://bit.ly/2JjSVcr