突發!《蜘蛛俠2》預告出爐有齊呢堆驚喜!

2019年01月15日 22:07
東網電視
更多新聞短片
《蜘蛛俠2》預告出爐!

今年除咗有漫威(Marvel)嘅《Marvel隊長》(Captain Marvel)以及《復仇者聯盟4》(Avengers: Endgame)備受注目,仲有Sony主導製作嘅《蜘蛛俠:決戰千里》(Spider-Man: Far From Home),粉絲連月等預告出爐,近日更於社交網求主角Tom Holland幫口,今晚終於堅有第一個預告睇喇!Tom原定當地時間早上5點45分開直播,後來話要6點先可以公布預告,不過粉絲有預告睇仍然勁高興派心心!

(以下含《復仇者聯盟3:無限之戰》劇透,慎入!)
「蜘蛛俠」對上一次就出現於《復仇者聯盟3:無限之戰》(Avengers: Infinity War),幫手對付大奸友「魁隆」,最後不幸化灰,《蜘蛛俠2》預告未見任何與《復仇者3》情節有關嘅場面,相信係留畀《復仇者4》交代喇,不過亦有唔少熟口熟面嘅人驚喜現身,當中包括「鐵甲奇俠」個老友保安「Happy」、「前神盾局局長」Nick Fury以及「Agent Hill」等。

預告一開始就見到「蜘蛛俠」Tom周圍幫人,仲同知道佢真正身份嘅「梅姨」瑪莉莎湯美(Marisa Tomei)出席籌款活動,令呀姨好驕傲,「Happy」法夫羅(Jon Favreau)出場與「梅姨」眉來眼去,睇到Tom眼定定!而Tom回歸學校生活時,老友Jacob Batalon與上集好中性嘅Zendaya都有現身,佢哋仲齊齊跟學校去歐洲旅行,Tom一度想放個靚假,唔打算帶「蜘蛛俠」新戰衣上陣。而去到景點,Tom讚Zendaya打扮靚靚,似乎會有感情線。

鏡頭一轉,Tom老友就被森姆積遜(Samuel L. Jackson)飾演嘅Nick用針榻整暈,原來佢打算要求「蜘蛛俠」開工對敵,救大眾包括同學仔脫離危機,後來巨型怪物「上水」,新加盟嘅積佳蘭賀(Jake Gyllenhaal)終於以奸友「Mysterio」造型現身,與怪物對戰,Tom嘅同學仔議論紛紛!至於落實有份回歸電影嘅上集奸角「Vulture」米高基頓(Michael Keaton)暫未現身,上集與Tom亦師亦友的「鐵甲奇俠」羅拔唐尼(Robert Downey Jr.)亦無影,未知是否與《復仇者》系列故事發展有關。電影公司另於社交網笑稱Tom偷步同粉絲公開預告,加碼放送電影海報。