馮盈盈素顏嚇親人　6號廿年前似小夫

依家網上大玩十年前後對比圖，唔少藝人都跟風玩埋一份，實行畀大家睇吓過去嘅黑歷史！先有平時官仔骨骨嘅陸浩明，一嚟就上載番廿年前嘅相，即係19歲嘅佢，同依家個樣冇咩分別，只係髮型唔同咗，仲有網友講笑話佢細到大都咁似小夫添！

至於前港姐冠軍馮盈盈，就上載張冇化妝嘅相，見佢當時應該試衫行緊騷，但黑眼圈都幾深，連盈盈都自嘲：「小姐，你邊位？」至於前華姐冠軍鄧佩儀就出貓，話搵唔到十年前嘅相，只係得九年前中學畢業相，被網友大讚佢依家個樣仲後生過九年前！

而何超蓮就晒出18年前嘅童年照挑戰網民，當時只得9歲嘅超蓮，剪咗一頭齊陰短髮，網民大讚超蓮細細個已經好精靈可愛，基本上同依家都冇乜分別，果然係真．女神！