移民台灣落地生根?鄧麗欣認有留意當地樓市
藝人鄧麗欣(Stephy)盛裝現身國際車展,以前面Deep V加後面露白滑肉背上陣,相當吸睛!Stephy另一身份為台式飲品店的老闆娘,傳有開分店的打算,她表示一直計劃中:「我哋都接受加盟店,依家都傾緊分店嘅地方。(會喺香港開?)希望今年開到,會早啲物色地方。(唔驚香港太多台式飲品店會過於飽和?)任何都飽和,所以會搵啲特別嘅地方,用多啲自己資源,係有難道但希望做到。」

睇時間見家長

有傳她睇舖同時亦有睇樓盤,密謀與男友於當地築愛巢「落地生根」,她承認有了解各地區行情但否認築愛巢:「冇咁快!自己對台灣唔熟,係睇舖嗰陣為咗想知邊一區多啲人流有留意吓,但冇真正去睇樓。(有置業打算?)冇諗過,係有留意嗰邊嘅樓市,因為八卦想睇。」新年將至,她自爆會同男友去旅行過節,問到旅遊目的地時,她甜笑封口:「去之前會拜咗年先。(帶男友見家長?)睇時間啦!」

收過「牛肉乾」

此外,揸開跑車的Stephy尷尬笑指曾收過「牛肉乾」:「揸車都係安全至上,唔會揸太快。」她又表示曾參加過賽車比賽勇奪亞軍:「自己都幾大膽,好鍾意玩機動遊戲呢啲速度感嘅嘢,依家有時都會玩高卡。」男友邱勝翊(王子)可會禁止飛車?Stephy笑話男友都有微言指太危險:「平時我揸車佢都會叫我揸慢啲。」