劉德華宣布退票　網友呻：點解咁耐

劉德華去年跨年演唱會因聲沙腰斬，結果搞到要取消餘下共7場演唱會，雖然佢諗過申請今年年底補場開騷，點知申請補場又不獲接納，呢鋪估計佢要蝕成千萬。今日佢官方facebook貼出咗特別通告，公告演唱會退票退款辦理方案，主辦機構提供兩階段的退票退款安排，包括由2月1日起至2019年4月15日止的郵寄以及2019年5月17-19日及2019年5月24-26日親身到紅館現場辦理。

所有退票嘅朋友最快都要等到今年5月底先收番錢，有人不滿留言：「唔明點解退款要隔咁耐先攞到」、「將件事搞到咁複雜」、又鬧手續繁複要填表、又要身份證資料，仲鬧寄失咗點算？邊個賠？總之就怨聲載道，而幫襯黃牛黨個班觀眾仲慘，畀多幾千蚊買飛，依家真係蝕入肉得個吉！