認愛？羅天宇唔排除情人節同陳瀅過

藝人羅天宇拍攝無綫新劇《她。她。她的少女時代》，對於日前他的朋友在網上甫了行花巿的照片，意外發現他與緋聞女友陳瀅一齊行花巿，他說：「傳咗咁耐仲講，我哋成班朋友一齊去，唔係拍拖，情人節都係繼續dry。（叫朋友唔好甫相？）冇所謂，都唔會特別避忌。（情人節一齊過？）都有可能，不過我可能會去美國旅行。（同陳瀅去？）唔係。」

對於劇中飾演健身教練的他指角色的飲食習慣，跟自己剛好相反，他說：「個角色成日食西蘭花同雞胸，我自己就好鍾意食甜品同零食，但為咗套劇都冇辦法要戒口，聖誕到依家已經食咗三個月健康餐，最唔開心係聖誕新年都唔可以大魚大肉。套劇講我係阿田（田蕊妮）嘅教練，佢向來好fit，我都唔可以肥過佢。」他透露日前拍了一場除衫的場口，就是為了這場戲而戒口三個多月，當拍完一場，他即時狂吃漢堡包。